Wajang Orang (satoe tjerita pendek)

0
87

Cerita pendek yang berlatar di Cimahi dan Bandung ini berkisah tentang seorang karyawan toko bernama Hok Tjoe. Dari Cimahi, ia pergi menonton pertunjukan wayang orang di Pasar Cikudapateuh, Bandung. Ia lantas suka dengan perempuan yang dikenalnya saat dalam kendaraan menuju Bandung. Namun, perempuan yang berjanji menyusul ke tempat pertunjukan setelah dari Tegallega, tak tampak batang hidungnya. Padahal, uang Hok Tjoe sudah habis untuk membelikan segala macam makanan hingga karcis menonton. Akibatnya, ketika ingin pulang ke Cimahi, Hok Tjoe tak punya ongkos.

Cerpen ini saya ambil dari majalah Sin Po, dan sengaja diketik ulang menggunakan ejaan asli. Sayang sekali, tak ada nama penulisnya.

—-

Koetika itoe panasnja matahari di boelan Juli ada keras sekali, Hok Tjoe rasaken kapalanja poesing dan ngantoek. Tempo-tempo ia iroep tjangkir aer kopinja. Dalem toko keadahan sepi sekali.

Toean Lie Kim Teng, Chef toko dimana Hok Tjoe ada bekerdja di Tjimahi, kabetoelan kaloear hingga tinggallah Hok Tjoe bersama doea penggawe laen orang Indonesier jang djoega asik ngelenggoet. Ia tjaboet horlogenja; sang tempo baroe mengoendjoek djam 2.10, masi lama aken pergi poelang. Iseng-iseng ia laloe gosok horloge ini.

Inilah ada satoe horloge merk Waltham koeno, satoe pembrian tanda mata dari iapoenja paman marhoem. Doea poeloe taon lamanja itoe paman telah pake ini horloge dengen tida perna ngalamken karoesakan apa-apa dan di tangannja Hok Tjoe soeda ampor sembilan taon, ini horloge toea teroes djalan dengan baek hingga ia merasa sajang sekali. Sakoenjoeng-koenjoneng di loear kadengeran boenji gamelan liwat jang dipasang dalem satoe auto….

“Apa itoe?” tanja Hok Tjoe jang mendadak brenti sabentar dan menengok ka loear, kerna biasanja kaloe programma bioscoop jang biasa djalan liwat, hanja poekoel tamboer dan gendang sadja sembari djalan.

“Wajang Orang, ‘agan,” saoet Achmad, sala-satoe penggawe Indonesier itoe jang tida kataoean poela soeda dateng dari loear dengen membawa satoe lembar programma, “Wajang Orang dari Solo jang boeka pertoendjoekannja dalam bangsal di Pasar Kosambil, Tjikoedapateuh, Bandoeng. Ini malem dimoelai dengen boeka pertoendjoekan lakon Ardjoena Mintaraga jang sanget rame dan digemarken oleh banjak penonton di segala tempat dan segala bangsa….”

Demikianlah Achmad teroes membatja itoe programma.

“Wah, kaloe saja poenja doeit saja aken nonton ka Bandoeng,” ia berkata achirnja sembari sodorke itoe programma pada Hok Tjoe.

Hok Tjoe tjepet samboetin; sesa’at lamanja ia mengawasin dengen paras berseri pada gambarnja di Petroek dan si Semar jang menghiasin kapalanja itoe programma, di tengah-tengahnja tertampak gambarnja Sri Panggoeng dari ini koempoelan Wajang Orang, di bawahnja terdapet bebrapa oetjapan poedjian pada actrice ini begini:

“Inilah ada Mas ‘djeng Soepijah jang dalem sedikit tempo telah tersohor namanja. Dalem berbagi-bagi Pasar Malem di bilangan Djawa Tengah dan Wetan ini nama soeda tida asing poela. Dengerlah soearanja jang empoek melajang-lajang; saksikenlah tari Solo jang aloes, menarik hati dan bikin seger otak dan obat mata jang gampang ngantoek!”

Hatinja Hok Tjoe mendadak djadi kakedoetan. Soeda lama memang ia tida perna nonton Wajang Orang jang ia kapingin sekali liat, denger lagi lagoe-lagoe, soeara dan bitjara bahasa Djawa aloes jang bagi iapoenja koeping sanget merdoe sekali dan bikin terbajang banjak hal pada masa ia masi anak-anak.

Aken tetapi setarikan ia djadi kesel, kerna Kotjih, istrinja, jang tida mengarti bahasa Djawa dan djoega tida soeka kerna tida mengarti sama tjerita wajang Djawa, aken tida maoe diadjak nonton. Kaloe ia pergi sendirian, sengadja sampe ka Bandoeng boeat nonton, tentoelah sang istri koerang senang, ngomel, tjemberoet setaoe apa lagi jang bikin kesel dan mendongkol hati.

Hok Tjoe garoek-garoek kapalanja. Ach, kaloe itoe Wajang Orang maen tempo boelan Juni, enak betoel. Tapi….dalam sakedjep itoe parasnja Hok Tjoe berobah berseri poela.

Koetika ia poelang sore lantas sadja ia banting topinja sambil katanja dengan tarik napas pandjang.

“Ach, jauw-sioe betoel,” ia kata, “kaloe bekerdja begini goea djadi kapingin brenti sadja dan tjari kerdjahan laen.”

“Kenapa?” tanja njonja Koetjih, terkedjoet.

“Djoeroetoelis Wira jang biasa toelisin rekening soeda doea hari sama tadi dia ‘ngga masoek kerdja, katanja meriang. Kim Teng soeroe ini malem goea kerdja semaleman ini sadja soepaja pakerdjahan katanja djangan kaboler terlaloe banjak. Kita noeroet salah, tida, djoega salah, mending kaloe dia kasi kita oewang overwerk.”

Dan Hok Tjoe menggroetoe teroes. Tapi di waktoe sorenja koetika ia kaloear dari roemahnja, tindakannja gesit sekali, dalem kantongnja ia selipin salembar oewang kertas dari lima roepia.

Koempoelan dari Wajang Orang memang selaloe pilih Pasar Tjikoedapateuh djadi tempat boeka pertoendjoekannja, poenjaken banjak sebab jang beralesan jaitoe boekan sadja deket benteng dalem mana banjak soldadoenja bangsa Djawa, tapi di itoe bagian kota poen tinggal banjak pendoedoek itoe bangsa. Perhoeboengan antara Tjimahi dan Bandoeng ada gampang, moerah, dan sampe djaoe malem teroes rame.

Dari Aloon-aloon Tjimahi sampe di Aloon-aloon Bandoeng, poesat kota, orang bisa menoempang Austinette atawa laen-laen kandaran denen pembajaran sapitjis!

Dalem ini matjem kandaran Hok Tjoe poen soeda “maboer” ka Bandoeng. Ini sadja soeda satoe adventure! Dalem itoe kandaran soeda doedoek bertiga orang sama Hok Tjoe. Tapi ini belon semoea kerna deket Tjimindi itoe kandaran mendadak brenti. Ada laen penoempang hendak toeroet dan siapatah itoe?

Astaga, dari tempat gelap naek seorang…prampoean moeda; wewangian jang haroem dan aloes menoesoek idoengnja.

“Poenten!” ia berkata dalem soeara jang empoek hingga bikin Hok Tjoe tjepet mengiser boeat….briken tempat di sampingnja!

Hatinja Hok Tjoe djadi dat-dit-doet tapi tra oeroeng ia tida loepa aken boeroe-boeroe soeloet cigaretnja aken tjoeri liat parasnja si ellok jang soearanja begitoe empoek kadengerannja.

Ini prampoean moeda ada pake kebaja pendek soetra dadoe berkembang, ditimpalin kaen batik Tjiamisan. Di tangannja pegang satoe tasch koelit. Iapoenja konde meniroe konde Solo.

“Ka Bandoeng?” tanja Hok Tjoe jang memang tida begitoe pande bitjara denen soeara sediit menggeter.

“Soemoehoen!” saoet si ellok dalem bahasa Soenda seraja bersenjoem manis, “kabarnja di Pasar Tjikoedapateuh ada Wajang Solo.”

“Betoel,” kata Hok Tjoe denen goembira, “malah saja sendiri poen hendak nonton ka sana. Bolehlah kita nonton…sama-sama.”

Si ellok bersangsi.

“Tapi saja…aken samper doeloe paman dan bibi di Tegallega,” kata lagi si tjantik liwat sakoetika, “tapi…tapi toenggoein sadja nanti di depan pintoe masoek…”

Wah, Hok Tjoe ampir maoe menandak saking girangnja.

“Baek, tapi djangan bohong.”

“Masa soeka bohong kakapeungan (djarang-djarang)!” tertawa si ellok.

“Djadi bohong selamanja!” berseroe Hok Tjoe jang merasa diganggoein dan semoea orang dalem itoe Austinette pada tertawa. Kakapeungan artinya tempo-tempo.

Sakoetika itoe sang kandaran soeda brenti di Aloon-aloon, Bandoeng, rasanja betoel-betoel terlaloe tjepet. Iseng-iseng Hok Tjoe jang djadi semingkin brani adjakin si ellok dahar doeloe dalem restaurant Madraiwi; ia manggoetin kapalanja.

Nah, begitoelah kaloe dasar maoe long-pwee. Di hadepin sama si ellok Hok Tjoe tentoelah tida ingin dikatain lelaki pelit. Ia makan, minoem dan tatkala aken berpisahan poen, ia bajarin doeloe oewang deelman jang bawa si ellok katanja ka Tegallega dan baroelah dengen sendirian dalem kendaran lain, ia pergi ka Pasar Tjikoedapateuh. Sasoedanja beli 2 kaartjis, ia laloe beli tjoklat, bonbons dan kembang goela hingga dalem sakoenja tinggal njelip pitjisan doea. Di sitoelah Hok Tjoe berdiri nongkrong depan pintoe toenggoein si ellok…

Aken tetapi sampe kakinja dirasain entjok, si ellok tida kaliatan mata idoengnja! Apatah barangkali ia soeda masoek lebih doeloe zonder Hok Tjoe liat? Ia lantas boeroe-boroe masoek.

Dalem bangsal soeda penoe oleh penonton, tapi si ellok betoel tida ada. Tapi tida apa. Liat, di sitoe ada satoe korsi kosong, di sabelahnja ada doedoek….laen prampoean ellok, malah kaja-kajanja adjak bersenjoem djoega sama Hok Tjoe. Ja, dalem perkara beginian poen orang roepanja kenal iapoenja up and down. Ilang satoe, timboel barangkali sapoeloe. Dan Hok Tjoe tida maoe pikir lama.

Dalem bedrijf kadoea dari ini permaenan Wajang Orang, Hok Tjoe soeda kenal sama prampoean moeda di sampingnja. Marika makan tjoklat, bonbons dengen goembira sekali. Satoe kali Hok Tjoe liat iapoenja horloge Waltham toea, djaroemnja mengoendjoek djam 10.23.

Ia nasu poenja tempo merdika ampir satoe djam lagi!

Setaoea sebab kasemsem oleh Sri Panggoengnja, entah oleh si ellok jang nonton sendirian dan doedoek di sabelah sampingnja, tapi Hok Tjoe menonton roepanja asik sekali. Satoe kali lagi ia tjaboet horlogenja. Mendadak parasnja poetjet…

Djaroemnja mengoendjoek djam 10.23 djoega! Ia tempelken itoe di koepingnja, astaga…apa jang belon perna kadjadian, sekarang terdjadi. Si horloge Waltham ini jang soeda 9 taon lamanja berdjalan baek, njatalah mati. Djam brapa sekarang?

Hatinja Hok Tjoe mentjelos saking kaget, koetika ampir dalem sa’at itoe, pentonton soeda pada bangoen dan boebaran kaloear. Pemandangannja terpoeter, hatinja berdebar, kaloe begitoe itoe tempo soeda djam 12 malem. Hok Tjoe poen sigra djalan kaloear.

Depan pasar roepa-roepa kandaran rame sekali. Banjak Opelette, Austin, Morris enz jang bertrak Tjimahi, dalme sakedjepan sadja soeda penoe dikroemoenin soldadoe dan lari saolah-olah terbang, jang laennja tarik penoempang dalem kota.

“Tjimahi…Tjimahi!” treak Hok Tjoe, “Lima belas cent, ja, brenti di Aloon-aloon, Tjimahi.”

Sopir itoe Austinette menjengir.

“Tiga talen ‘agan, saja tarik,” ia menjaoet, “sebab soeda malem, tida ada harepan ada penoempang laen.”

“Ach, ada, nanti di djalanan.”

“Soesa, ‘agamn, penoempang Tjimahi soeda ditarik semoea,” kata poela itoe sopir sambil tertawa dan djalanken lagi kandarannja.

“Biarin anem pitjis…” kamoedian ia bertreak blakangan.

Hok Tjoe tida saoetin dan djalan teroes. Di Prapatan Lima, satoe auto taxi liwat.

“Tjimahi!” treak Hok Tjoe dan rrrtt itoe taxi brenti.

“Noempang ja, lima belas cent, Tjimahi?”

Zonder kata ba atawa boe, si sopir indjek pedal gasnja….ssst ia soeda terbang kentjeng dengen semboer Hokt Tjoe sama asep boesoek dan deboe jang moelek! Ampir Hok Tjoe djadi moentah. Kringet dingin mengoetjoer dan ia djalan lagi, pikirannja sanget riboet. Waah, tjilaka kaloe begini….

Deket Bragaweg kombali Hok Tjoe dapetken satoe Morris.

“Tjimahi?” treal ia.

“Sendirian?”

“Ja,” kata Hok Tjoe demgem [emgrasahan tida enak, “tapi begini…maoe…maoe dibajar sadja sama…horloge!”

“Aerlodji?” tertawa si sopir “aerlodji apa?”

Paras moekanja Hok Tjoe djadi merah, koepingnja panas, sembari gigit bibirnja ia kaloearin iapoenja horloge.

“Isss…ini sih aerlodji….roesak!” ia kata sembari maoe lantas kasi kombali lagi pada Hok Tjoe dengan tertawa berkakakan dan lagoe soearanja kadengeran separo menghina, hingga Hok Tjoe ampir kaloear aer mata saking marahnja tapi ia tahanin hati. “Ini bagimana poeternja, pake…kontji kaja lotjeng?”

“Diam!? kata Hok Tjoe, “baroesan dompetkoe ada jang tjopet dalem tontonan! Sekarang itoeng-itoeng akoe taro gade sadja, besok kaoe boleh dateng di tempat pakerdjahan’koe dan akoe nanti teboesin tiga talen. Boeat…sapoeloe roepia sabetoelnja akoe poenja horloge ini akoe tida aken djoeal, tjoema barangkali kaoe tida pertjaja pada’koe, terpaksa sebagi gadean kerna akoe perloe ini malem djoega poelang ka Tjimahi.”

Sin Po edisi 29 Oktober 1938.
Penulis anonim.

LEAVE A REPLY

Please enter your comment!
Please enter your name here